هي لذكرى

لا بارك الله فالكلام اللي يضر المسلمين
ولا بارك الله في جماه ولا جما من شجعه

إستنطق الشيطان شعار الفتن والمسرفين
يضرب بأمن المنطقه من الجهات الاربعه

ياهل قطر يكفيكم التاريخ والعذر السمين
في وقعة الخفجي وجيشٍ مايخلي موقعه

يوم انها بالنار والبارود والعلم اليقين
بان الصحيح ابساعةٍ لضيق مافيها سعه

وش عاد فيه اصدق من الارواح واعروق الوتين
من لا يصدق اقلعه مالله ولا حنا معه

اقولها وانا ولد عمي مع الدوحه سجين
لكن مواطن في بلاده والامور امسنعه

هذا كلامه فالسجن ماهوب قول الحاقدين
اللي تحرى للفتن بالوجه أو بالاقنعه

اتحوف من حول السياسه فالكبير وفالثمين
والمنفعه ،، الله عليم بويش هي المنفعه

أمن الخليج وقادته ماهوب للمستشعرين
ولاْهم بحاجة من يصوغ الفكر ولا يطبعه

حكامنا حكام الامه فاللوازم حاضرين
في ظل جلسة انعقاد وتنتهي ذا الزوبعه

لا هنت يافايح وعين العقل منطوقك رزين
والله يسامح من تعصب وانفلت للامعه

التفرقه ماهي لنا وعيال زايد مكرمين
وال الصباح اخوانكم وانتم لنا الأشرعه

واخوان نوره درعنا والسلطنه حصنٍ حصين
وال الخليفه عزنا والمعتدي ابنردعه

لا بارك الله فالكلام اللي يضر المسلمين
ولا بارك الله في جماه ولا جما من شجعه

فلاح بن مبخوت العجمي