مرثيه للشاعر ناجم الزراقي

الاخوه الاكارم السلام عليكم

نهار الخميس العصر في عشر من عاشور
بداية سنة سبع وثلاثين هجريه
قعدت استعيد ايام وشهور ثم دهور
سنين مضت كانت من العمر منسيه
تذكرت مامريت به من قسا ومرور
وحياة الشقا واليتم في ماضي سنيه
ياكم ليلة مرت وانا خاطري مكسور
بعد ما فقدت امي تمثنتني الكيه
تذكرت حالي ناحلا كني العصفور
اتلي شيله بيض واسحبلي عصيه
وعليه ثويب ساحلي منكبه مقرور
وعليه عمامة شال من دون طاقيه
ضعيف الجدا والجهد يقنعني الميسور
ولا لي طموح بعيد لا ذي ولا ذيه
لكن الله اللي يبعث الميت المقبور
رزقني ووفقني وانا مامعي شيه
الي بيت في الطايف وبستان في المنجور
وبيتا بعاصمة الديار السعوديه
وعندي نياق طيبه من خيار الخور
ومن الضان عندي فوق مية نعيميه
وصحيح البدن والعقل ماحتجت للدكتور
ولا احتجت من مخلوق عونه وعاريه
لك الحمد ياربي وانا عبدك الشكور
لكن كيف ابا اوفي شكر الانعام هاذيه
لو اسجد لربي من هنا لين نفخ الصور
ما وفيه شكر العشر معشار من ميه
طلبتك ياربي ساعة الحشر والنشور
عسا والديني في وسط بارد الفيه
كما ربياني يا الاهي بدون قصور
وقامو علي بكل عطف ومحنيه

وسلامتكم