الـــيـتــيــم

وجدي على من فارق القلب وأشقاه
وجد اليتيم اللي فقـد شوفـة أمـه
كانت هي أفراحه وروحـه ودنيـاه
ولا عاد شي(ن) من بعدهـا يهمـه
فقد حنـان الوالـده فـي المعانـاة
يوم انهـا بيـن الأيـادي تظمـه
اقبل نهـار العيـد والكـل ينسـاه
كل(ن) سهى بفراح من دون همـه
وقف على بـاب الفقيـده ويكسـاه
ثوب(ن) جديد امه تشوف وتزمّـه
يزعل ويطرد كل من جـاه يدنـاه
يقول يمه اطلعـي الحيـن يمـه !
متعود(ن) بالعيـد لا اقبـل تلقـاه
صاير يتيم وبعدهـا صـار غمـه
واصبح يعيش بهم واصبحت ويـاه
هم(ن) على قلب المفـارق يسمـه
على هنوف(ن) غاية القلب ومنـاه
اصبح غلاها مثل فرض(ن) نتمـه
حلوه عفيفه تشبـه الريـم بخطـاه
اليا انثنت في عودها شرق ويمـه
اسود شعرها ناعم(ن) كيف محـلاه
صعبً عليهـا رفعتـه لـو تلمـه
لولا الكفوف البيض غطى محيـاه
ثم جَـرّح الخديـن والكـف لمـه
والله يعلـم يمكـن الشهـد بشفـاه
لا ضمة الشفه على الريـق ضمـه
ذيك الشفايف جمرتيـن(ن) مغطـاه
بَسْـوَد لثـام(ن) كفهـا لـه يلمـه
وليا حزنت في عينها الدمع يمـلاه
جاها الخفوق وكـل عـاذل يذمـه
جاها نداوي مكسب الطيـب مبـداه
متنومس(ن) مابيـن خالـه وعمـه
وراحت وصارت شي ماعشت لولاه
همـي واشيلـه وآتعنـى واذمـه
وجدي عليها وجد من قلبـه اشقـاه
والا يتيم(ن) فاقد(ن) شوفـة امـه

الشاعر
صالح جزاء الحربي

مرحبا الوف في مرقاب الشعر والشعراء..
مشاركة أولى مميزة..
صح لسانك عدد حروفها...
سعداء بتواجدك..
وننتظر منك المزيد..
تحياتي