[ طـــواري ]

صباح الورد والنسرين واليشــموم
صباح اللي يحب الــ من يحب إلزام

من البارح حرمت الجفن طعم النوم
عشان أصبّحك بالخير .. ثم .. أنـام

زاح الظلام وشعشعت شمس الصباح
وغرد على غصن البشـــــــام البلـبلي

وغرد من تغريدته .... والصدر فاح
للغالي اللي بالغلا . . . . ماله حــلي

الصبح تتنفس ازهاره شذى عطــــــرك
ويميل غصنه وتتراقص عصافيـــــــــــره

ويقول بكتب حروف الشعر في سطرك
ميّت من الشوق وأنا ميّتٍ غــــــــــيره

الصبح حلّ بطلّته
والطير من عشة صحى ,

ورفرف بجنحانه
وبأعلى الصوت من غصنه صدح ,

ومن ريقك الحالي
قبل مايطير
يمتص الحلى ,

ويستغرب !
ان الريق حالي
والحلو
كله ملح ,

حبيبي , ليـله ينـــام بأوّلـه بـــــــــــــدري
وليّا صحى : صبحه الباكر عبق جوري

وأنا أسهر الليل , نار الشوق في صدري
وصباحي : الشاهي العلقم من [ الغوري ] !!

أنته تبي في القلب ولاتبي العين
كلٍ يقول أبغيه يسكن بـ وسطي

وتهاوشوا في حبّك وزعل الأثنين
ويمكن بـ تاليها محقّق وشرطي !!

كم من مريضٍ طاب من دون دكتور
لو هو طريح فراش تحته وساده

ما طاب من خالد وناصر ومنصور
طايب من أحلام وجواهر وغاده !

ويش رايك نقتسمها بالنصيفه
الحلا والملح وابيوت المشاعر

لوّ مدحي فيك ماتسوين ليفه
ولوّ تعذيبك .. ترى ماصرت شاعر !

هل تعلمون الخير لاهبّ العجاج ؟
فرصه حبيبٍ ودّه يشوف الحبيب

من الربو كلٍ يدّور له علاج
وتواجهه صدفه على باب الطبيب !

بعض البشر لاتكلّم يفجر الطبّله
وبعض البشر لاتكلّم قلت له عيده

كلام مقبول ( + ) وجه له قبّله
وان عاد مليون ماملّيت ترديده

أنا مشتهي قربك
وفنجال من يمناك .

مثل مااشتهي فالصبح
نصف استواء كبده

سر الحياه يدور بين الشفايف
قل للمسولف لايكثّر كلامه

دايم تبسّم دام مابه كلايف
تكسب جميع الناس بالإبتسامه

لو تموت المشاعر ماتموت الغبينه
آآآه ياحر كبدي وآآآه يابريّ حالي

عقب حبيته وقلبي في حبّه رهينه
راح .. واللي بقى لي غترتي والعقالي

إي والله إني أحبّك يانظر عيني
حبٍ من الله ولا اسمع فيك عذّالي

شوفك يعدّل عواجة سالف سنيني
متي تكونين .. زوجه وام لعيالي

احظوظ ياطيبها واحظوظ مقهوره
ولاجات دنيا البنادم مثل ماودّه

الحظ واقف واشوته شوتة الكوره
ويجنّب الباب ويحوّل مع القدّه !

مات الوصل . ظلم . لا ذنّبه ولا ذنّبي
وكفنّته الصبح بعد حظوظنا عيّت

وكبّرت أصلّي عليه وكبّرت جنّبي
من خلّفنا ذكريات وقدّمنا ميّت

ألا ياوجودي وجد من غاب عشر سنين
عن امّــــه وسافــر صوبها دمــعه يهلّي

دخل بيتـــها ، ثم مالقاها مع الحييـّـــن
على اللي بعد فرقاه , همّي علي كلّي

ياليتها هجران وغياب ونزاع
يغيب بس إزمام حبّه في يدي

مير المصيبه لأمر أبوه العود طاع
وأحرمني المقرود من شوف ولدي !

ياحظّي اللي في طريقي تعثّر
هذي ثمان سنين طايح محلّه

مايجمعه فالوقت طاح وتنثّر
لاراتب ولا ام العيال ولا فلّه !

واخظّي اللي صابته غرغرينه
في رجله اليمنى ووقف عن السير

إليا اقطعوها طاح .. ربي يعينه
وان اتركوها , ماهو معيّن خير !

لاعاد يوم فيه غيرّت دلّك
مااحلاك لولا الغدر طبعك يامحلاك

العام جيتك كلّي .. أبغيك كلّك
واليوم مابغى شي .. ياكود فرقاك !

إي والله أحبها من قلب وافديها
وإن شفتها طيّبه تنزاح كل غمه

أخفض جناحي وأقبّل بطن رجليها
وأقول تبطين وأنتي بخير يا يُمّه