البيـج والبـرتقالي !

[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
يارب عفوك قبل لا أخطي ولا آصيب = وآقـدّم دقاقي وآقـدّم جلالي
هذا ولا لي غير عفوك مطاليب = وبيدك ياربـّي وقفتي وإنتقالي
عليّ بذل الجايز من التسابيب = وعليك ياربّ العباد إتكـالي
مشيت في برد وعجاج ولواهيب = شيً تعكـّر لي وشيً صفى لي
كذا حياتي عفس من دون ترتيب = خليط بين الواقعي والخيالي !
أحيان أطوّع عاصيات الهناديب = وأحيان هندابي على قد حالي
واليوم ماهندبت أسجـّل تجاريب = الموقف أكبر من لحون وملالي
فيه أرتجلت الحزن معنى وتركيب = قدّام أترجمها بقاف إرتجالي
حـدّي خفوقي يالضلوع المحاديب = العلم عـدّا طاقتي وإحتمالي
ما هو بعيبً لو غزى راسي الشيب = (العيب زرع الهيّنه عند غالي)!
الله يجنـّبني هل العيب والعيب = والله يجمـّلني ليا جا مجالي
أغيب بعض أحيان وأحيان ماآغيب = حسب الظروف وراحتي وإنشغالي
مرّات أعشي من عشا ليلي الذيب = ومرّات ما ألقى لي عشاً من حلالي !
بعض الليالي لا منادي ولا مجيب = ومناديً ومجيب بعض الليالي
الوقت هذا فرّ كل الدواليب = ومن كان الأوّل حطـّه الوقت تالي
وطـّى مقام الكفو عـطـْب المضاريب = والهيس حطّه فوق صاحب معالي
تسيـّد الهافي كبيـر اللغابيـب = وتقيـّد الوافـي حميد الخصالي !
حتى بقايا الناس صارو مناصيـب = وروس الرجال يجمـّعون الخوالي
والحدب خلاّها بليـّا مقاضيب = تعالي وروحي وروحي تعالي
إيهيب يا ذا الوقت وإيهيب وإيهيب = أنت السبب في ضيقتي وإنفعالي
عذربت رجـّالً بليـّا عذاريب = أستغفر الله صار منظر جمالي !
لكن ومن مبدا سلام وتراحيب = قبل الغروبي يختلط بالزوالي
نقل البنادق غير نقل المشاعيب = يا ساحب المسحوب هلّ الهلالي
هذا زمان اللعب وإلعب يا لعـّيب = وإحذر ترى الأيام مرًّ وحالي
ثلاثة أرباع الوطن لك معازيب = وربعً بقى خالي ولاهو بخالي
العام شفها بين جمـران ومغيب = واليوم بين البيج والبرتقالي !!
[/poem]