(*(( قطعة قماش ))*)

[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""] ياسادة الشعر ، الأدب فالشعر منهاج الأمم = يانكتب الشعر بمواثيق الأدب .. ولاّ بلاش
ماكلّ شي يمرّ فالخطّر ، نسلّمه القلم = حبر القلم غشّاش بعض احيان .. وعلومه غشاش
تبقى .. إرم ذات العماد .. بعين خلق الله ، إرم = مدينة قصور ، ومواطن خير ، وزهور وفراش
لو انّ فيها عيب واحد ، بـ اذكره ولا جرَم = حرّاسها واجد ، وسيّدها كثير الارتعاش
والسور عالي ، واصغر الابواب مايقبل قزم = ماعاش فيها ، غير عملاقين بقلوبٍ بشاش
واربعمية فارس ، وبنت حصان ، والباقي خدم = يليّمون اللي هبوب الريح جت به .. في خياش
والعزّ ، شال الساريه .. والساريه ، شالت علم = والعقل ، حط المشكله .. والمشكلة ، حطت غباش
والشتم سهل ، وكل بن رجّال بلسانه عظم = سلاح من ماله سلاح اخلاق .. وعظامه هشاش
والدنفسه ، والحكحكه ، ماخلّدت شاعر علم = يفقد مع انسانيّته ، مواهبه .. ويروح ماش
والحقد ، ماله في صدور اهل الوفا موطأ قدم = يستوطن الصدر الخراب .. ولا تمكّن فيه عاش
والضيق ، مهما كان .. ماعمره على دوله حكم = عابر سبيل .. تمرّ به قوافله في كل جاش
يلخبط اوراق الضمير العفّ .. ويخلّف ألم = لكنّ ماتكسر مساحيه .. الغصون امّ العشاش
والآدمي مهما تجنب فالخطا ، دم ولحم = مرسل ومستقبل .. مصوّر ومتصوّر بالفلاش
لكن ضروري يدمح الاخطاء .. من باب العشم = لو يضمحّل القرم في عين الزعل ، ويصير لاش
والطبع غالب .. والتطبّع يغلبه لامن هجم = لاصار طبعه شين ، في تطبّعه .. خدمه بلاش
لابد مايستوعب الانسان ، وش معنى : ندم = ولا بد مايستوعب الانسان ، وش معنى : نقاش
لن النقاش ، يعلّم الانسان يبقى محترم = ولنّ الندم ، مصالحة نفسه عليه .. بلا هواش
والشهم ، لو دارت رحا الدنيا على قلبه .. شهم = كفّ التسامح ، مايمسّحها على حد الفرْاش
والحب بين الناس .. مايولد ، على رز ولحم = يولد ، من بطون المواقيف ويثير الاندهاش
وعدم توافق آدمي مع آدمي ، ماهو لغم = يفجّر العشره مابين الناس .. وتروّح طشاش
ياآدمي والشك عمّ العالم ، إلاّ من رحَم = خذها نصيحه وافيه ، من قلب مايكرهك .. كاش
مهم تبقى انسان واثق في ضميرك ، والأهم = انّك تعرف ان الحياه بكبرها .. قطعة قماش[/poem]