عيــــديّه

السلام عليكم ورحمة الله وبركاته

من العايدين قبل الزحمه وبعدها

[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=0 line=1 align=center use=ex num="0,black""]
كلْ عام والمسلمين بخير = لو إنها صعبه شويه
جمله ترى مالها تفسير = تنقال فالفطر واضحيه
تركيب .. واصياغه .. وتعبير = ومشاعر ٍ لا شعوريه
فالمجتمع مالها تأثير = الاّ تثير الحساسيه
بالله يا فنّي التخدير = ما ناقص أخطاء طبيه
نفخت مع نافخين الكير = وأحييت روح انهزاميه
مع خالص الشكر والتقدير = لظروفنا الإقتصاديه
نعيش في مرحلة تطوير = وانموت لا ذي .. ولا ذيه
اشطب على الفكر والتفكير = وأكتب عن الوعي مرثيه
(حوار ) الأديان حاشي ضير = يشرب حليب السعوديه !!
والله ليبطي مصار ابعير = لو سوّقوه الشريطيه
الزيت مع داهنين السير = تقاسموه الحونشيه
بالعيد يا سايق التبشير = مانيب فرحان موليه
بشّر به ( احجاب ) و ( التعمير ) = و ( الأندلس ) و ( العقاريه )
كلْ عام والعيد عايد .. مير = بين انفعال وفعاليه
كلْ عام ومعايدينا غير = وأعيادنا غير عاديه
كلْ عام مانقبل التغيير = الاّ بحاجات سلبيه
كلْ عام مع صفنا الآخير = انوقّع الإتفاقيه
مال الفشل عندنا تبرير = ولاللنجاحات ماريه
وش صار فينا .. وويش يصير = أحداث الأمه دراميه
يا مصّور اتعب على التصوير = أدوار ربعي بطوليه
تعلقوا في جناح الطير = والطير كلّه رومنسيه
شدّت طميه وآقام النير = على ظهر كوره أرضيه
لو جيت فازع وجيت امغير = ردّة فعل لا إراديه
نستبعد الخمر والخنزير = وانقرّب السمّ والحيه !!
ما فيه للمؤمنين أمير ؟ = يا أهل البشوت الحساويه
ما فادت اسياسة التشفير = لأقمارنا الإصطناعيه
هدّوا شرفكم بأبو جنزير = وابنوا علاقه حميميه
يا معلن العيد بالتكبير = ما عاد للعيد اهميه
تراك مسموح فالتأخير = وأعيادنا شبه يوميه
كلْ عام .. كلْ يوم وأنت بخير = من قلب والنيه النيه
عيّد على ذمّة أهل سدير = وأخذ مع العيد عيديه
[/poem]



وسلامتكم