مافيه مشوارٍ ماندفع غرامه !!

طرت وجرت

عيّنت شمطان اللحى والطحاطيح ::..
فريسنا اللي يحتمون الجهامه !!

كسابة النوماس مع هبة الريح ::..
نفخر بهم منه ليوم القيامه !!

تاريخهم منور سواة المصابيح ::.
اهل الشداد اللي ماترضى المسامه !!

على الوفا والطيب فـ صدورهم فيح ::.
يجلون عن وجه الدخيل الملامه !!

مارق واخو هملا ولا انسى شليويح ::..
ومسلط وتركي هم شيوخ الزعامه!!

وعفاس وصنيدح بعيد المشاويح ::..
وشبيب ابن حجنه مايرخي حزامه !!

ياكثرهم من غير حصرٍ وتوضيح ::..
من لاذكرته وش نقص من مقامه !! ا

فعولهم على كبود العدا قيح ::..
وتاريخهم يفرض عليك احترامه !!

في عهدهم ماينبحون النوابيح ::..
والصقر ما اصبح صيدةٍ للحمامه !!

ولاياخذون لبنية البيت تصريح ::..
عاشوا عزاز وموتهم بالكرامه !!

راحوا مراويح النجوم المدابيح ::..
الموت سنه والزمن له نظامه !!

واللي بعدهم شوخ لكن مصاليح ::..
كلن على قرصه يخاف ويدامه !!

وكم شيخ فيهم سمعته كنها الشيح::.
على القبيله ماذخر في اهتمامه !!

والاغلبيه ودها تقوم وتطيـــــح ::.
والختم ماهو جيب.. بشت .وعمامه !!

الله يعين اهل القلوب المجاريح ::..
في نجد ولا في الحجاز وتهامه !!

صرنا طعامٍ في حلوق التماسيح ::..
مافيه مشوارٍ ماندفع غرامه !!

بالدين ..نضرب الشحم والمفاطيح ::..
ونقابل اظروف الدهر با بتسامه !!

ترى اغلب شيوخ الزمن ذا مشافيح ::..
ماهو جهل في الطيب ..لكن رخامه !!