نصوص مرقابية راقت لي

للمبدع / فهد الزعبي


ياناشـدٍ عنـي وعـن ذكريـاتـي
مانيـب قايلـك بجاوبـك بعديـن

بقعا تصادمني من أربـع جهاتـي
أروح منها ويـن وإلا أتجـه ويـن

دورة رحاها عـام وأنـا رحاتـي
نصيبها مـن دورة العـام يوميـن

من خوفي إمن سنينـي المقبلاتـي
ودي أعـود مـن زمانـي سنتيـن

قبل تعرف صدقي مـن مجاملاتـي
ماشفتني منها خسـرت الكثيريـن

خسرتهم وأغلقـت بـاب أمنياتـي
ومات الشعور وجارك الله من الشين

لو البـلادة وقتهـا مـن صفاتـي
ماكان شبت وعاد عمـري ثلاثيـن

أسج بعض أحيان وأرجع وأحاتـي
وأقول وش حنا من الخلق راجيـن

من تجربة واقـع ومفهـوم ذاتـي
الكون فيه أموات بأجسـاد حييـن

قـومٍ روابعهـم ضيـاع وشتاتـي
لعلنـا منـهـم بـربـي غنيـيـن

أخرجت فأصحاب المصالح زكاتي
نصابهـم لاغلـق الحـول ثلثيـن

لي وجه وأظهربه بعـزم وثباتـي
على النقا ماعشت عمري بوجهيـن

الآدمي لأخطـى سبيـل النجاتـي
اول مايفقـد فاللـزوم الموالـيـن

من مولدي وإليـن ساعـة وفاتـي
وقناعتي فالنـاس تبقـى لهالحيـن

أقبح ثلاثـة شفتهـم فـي حياتـي
النـذل والكـذاب ومفـرق البيـن


...