هي لذكرى

لا كثرت اهمومي علي مافيه غيرك ارتجيه
فالعسر ولا فالرخى مافيه غيرك يا ودود


المعطي الرزاق والمنان والامر ابيديه
اللي من أفضاله على الاجواد من خيره نجود


تجارب الدنيا عظه واحلامنا واللي نبيه
المغفره بالاخره والفوز في يوم الخلود


رضاك يارحمن ماساوم ولابدّي عليه
لو كثرت اذنوبي فانا آمنت بك رب الوجود


اجاهد النفس الشقيه والخطا وان كنت اجيه
ماضاق صدري دام لي موضع يكفي لسجود


اندم على مافات والتوبة طريقٍ نهتديه
والهادي الله رحمته سباقةٍ قبل الوعود


في عالمي اشوف شيٍ مابدى منّه واليه
ابرئ من اعقول الكفر والملحده واهل الجحود


وجهة وجهي للملك من قبل تسّود الوجيه
اعوذ به واستغفره لامرني اوجيه سود


اللي وقايعهم مع التاريخ فالقسم الكريه
لا عمرو ولا اعمرو واجسادهم فيهم شهود


من قال مابه رب قل مافيه شيٍ ازدريه
الا انت ياوجه الكُفر للنار وامثالك وقود


من قبلهم فرعون والنمرود واقوامٍ تليه
مافادهم كثر التكبر والتعالي والجنود


( يِسّلم من الكُفار عَالِم ) ( عندنا يكفر سفيه )
مفارقه ابصرتها بين الهدايه والجمود